平時大家日本菜就食得多喇,但係又知唔知日本人新年會食啲咩呢? 今次就同大家分享一下,
日本人新年必定會食嘅御節料理,同埋入面各種食材嘅寓意。
講解御節料理之前,要簡單介紹一下日本嘅「節句」。「陰陽五行」喺奈良時代由中國傳入咗去日本,而日本人依照佢嚟制定曆法,就成為咗「節句」。一年共有5個,分別係人日(1月7日)、上巳(3月3日)、端午(5月5日)、七夕(7月7日)同埋重陽(9月9日)。以前日本人每逢節句都會食御節料理,但係而家就變成咗新年先會食嘅菜式。
其中一個原因係畀平時照顧大家起居飲食嘅阿媽好好休息一下。媽媽可以預先整定啲又好意頭,又容易保存嘅食物喺屋企,咁佢新年嗰三日就唔使日日煮餸啦。而各個地區同家庭亦都會有各自嘅習慣,所以食物嘅種類、擺放方式以及重盒嘅層數都會有啲唔同。今次就為大家介紹最常見嘅14種食材。
地作(甜沙甸魚乾)
以前種米嘅時候,會將沙甸魚切碎加入植物燃燒後嘅灰燼入面,作為肥料。為咗祈求今年豐收,就將沙甸魚乾改名為地作。
鯡魚子
可以喺圖片睇到長條型嘅鯡魚子由好多粒魚子組成,希望食咗之後可以兒孫滿堂。
黑豆
黑豆嘅寓意係全家人成年都精神健康地工作。
伊達巻
古代會將書本卷成員筒狀,而伊達巻就被視為有文化發展嘅意思。
蔬菜煮物
將唔同種類嘅蔬菜煮埋一齊,有家庭和睦嘅嘅寓意。
蝦
蝦喺煮熟之後先會捲埋,啫係終其一生都係挺直腰骨嘅,有健康長命百歲嘅寓意。
牛蒡
由於牛蒡生長於地底,有屋企地基穩固嘅寓意。
蓮藕
相傳佛教極樂嘅水池入面都生長咗蓮藕,所以蓮藕被視為純潔嘅食物。另外,蓮藕嘅窿亦有可以預見將來嘅寓意。
昆布卷
昆布(こぶ)同喜悅(よろこぶ)嘅日文有相同發音,代表開開心心。
醃蘿蔔絲
祈求平淡嘅生活嘅話,就會喺新年食白蘿蔔。另外白蘿蔔生長喺泥土之下,亦有屋企地基穩固同繁榮嘅寓意。
菊花
菊花作為日本嘅國花,由古至今經常會喺新年等喜慶節日見到用菊花伴碟。
日本新年仲有其他食物值得同大家分享,但係礙於篇幅有限,今次就先為大家御節料理先。如果新年有機會嚟到日本,喺超市都好容易可以買到御節料理,有興趣嘅話就買嚟試吓喇!