香港同日本嘅生活習慣、氣候、飲食等等都不盡相同,有時都少不免會因為咁而唔舒服。如果覺得身體有唔妥,呢個時候就一定要求醫喇!
日本嘅醫療制度同香港唔同,所以都有好多地方需要注意返,呢篇文會簡單介紹一下日本睇醫生嘅注意事項,等你需要睇醫生嘅時候都無咁騰雞!
日本健康保險制度
日本嘅健康保險制度適用於所有喺日本逗留超過3個月嘅人。除非你嘅簽證屬於「外交」或「短期滯留」,又或者簽證過期等等特殊原因,否則都有加入日本健康保險制度嘅義務。
日本嘅健康保險制度主要分成兩種:社會保險同國民保險。
社會保險係當你受僱於一間公司嘅時候,由公司幫你去申請嘅保險。
而國民保險就係無加入社會保險嘅人去申請嘅保險,即係學生等等。
兩者細節上稍有不同,但基本上喺加入後,都會攞到一張保險證,證明你加入咗邊個保險,憑住呢張保險證,喺睇醫生嘅時候保險就會包70%,自己只需要負擔30%。
睇醫生嘅時候要帶乜嘢去?
①健康保險證
②診察券 (如有)
③お薬手帳
④現金
⑤常用藥 (如有)
⑥介紹信 (如有)
⑦*個人編號卡
①健康保險證
正如上文所講,保險證係你加入咗健康保險制度嘅證明,如果冇帶呢張證,冇帶嘅嗰次睇醫生就需要支付全費,冇得後補,所以建議大家唔單止睇醫生嘅時候,平時都最好帶住,以防突然要去睇醫生嘅時候,冇得享用保險價。
②診察券 (如有)
診察券即係覆診卡,一般喺「初診」(第一次睇) 嘅時候,護士會發俾你,之後「再来」(覆診) 嘅時候就記得帶埋,方便醫生同護士搵返你嘅病歷喇!
③お薬手帳
日本實施醫藥分家,所以睇完醫生之後,仲需要去藥房買藥。雖然唔記得帶,都唔會影響到買藥,但為咗方便藥劑師翻查你嘅藥史,最好都帶埋去。
如果你本身冇,可以同藥房提出,佢哋會免費發一本俾你。
另外亦都可以用手機APP,現時除咗專用嘅お薬手帳APP之外,唔少藥妝店嘅APP本身都有附帶呢個功能,非常方便!
④現金
雖然大部分醫院同診所都擺咗部信用卡機喺度,但如果係保險範圍內嘅診治內容,一般只會收現金,只有保險外嘅治療,先可以俾信用卡。另外,而家因為無現金支付逐漸普及,所以都多咗醫院診所肯俾病人用QR Code支付,但目前現金依然係主流,所以帶現金會比較穩陣。
⑤常用藥 (如有)
同喺香港睇醫生一樣,如果有食緊嘅藥,記得帶埋去俾醫生睇,協助醫生判斷你嘅病情喇!
⑥介紹信 (如有)
如果係由另一位醫生轉介,都記得帶埋佢俾你嘅介紹信,有部分醫院診所如果見唔到你有介紹信,喺某啲項目會當你喺完全無醫生睇過嘅新症,有可能額外收取「初診料」。
⑦*個人編號卡
如果你嘅個人編號卡已經同保險證做咗連攜,你可以直接帶個人編號卡,而唔需要帶保險證。但記得,呢個服務只限做咗連攜嘅人,如果未做連攜,醫院同診所都唔會搵到你嘅保險資料,一樣無得用保險價架!
應該睇咩科嘅醫生?
喺日本睇醫生,除咗要記得帶齊以上嘅嘢之外,仲要搵啱醫生睇。
喺香港,一般會搵就近嘅普通科醫生睇咗先,當呢位醫生判斷需要轉介去專科,先會再寫介紹信,或者由病人自己再book專科醫生。
但喺日本,你會發現日本冇所謂嘅「普通科醫生」,好多本身就寫清楚自己係咩科。但病人點樣判斷自己睇咩科?香港嘅醫科分類同日本一唔一樣呢?
事實上,就算係日本人,都未必可以下下好精準咁判斷到應該睇咩科,所以大家唔需要慌張,以下落嚟為大家介紹兩個方法,希望可以幫到大家。
①東京版救急受診ガイド
https://www.tfd.metro.tokyo.lg.jp/hp-kyuuimuka/en_guide/main/index.html
呢個網站有日文版同英文版。網站內會問你大約五條問題,包括你嘅年齡同症狀,之後佢就會判斷出你應該喺幾多小時之內去睇邊一科嘅醫生,相當有用!
②東京都保健医療情報センター
Tel: 03-5285-8181 (毎日 9:00AM – 8:00PM)
遇到緊急情況需要急call白車,記得要打119,但如果係一般醫療相關嘅咨詢,例如想問日本嘅醫療或保險制度、自己應該睇咩科,就可以打去「東京都保健医療情報センター」,有英文、中文、韓文、泰文、西班牙文嘅服務,所以就算日文唔好,都唔使驚!
另外,如果完全唔知應該睇邊一科嘅醫生,都可以去大醫院嘅「総合内科」掛號,又或者直接入去任何一間診所問醫生意見,任何一科嘅醫生都可以為你判斷應該睇咩科,最緊要係有病就去睇醫生呀!
常見病症與科目
以下會列舉一啲常見嘅病症,希望幫助大家判辨應該睇咩科。
耳鼻喉科:發燒、耳鳴、流鼻水、喉嚨痛
消化器科:肚痛、便秘、痾嘔、食欲不振
呼吸器科:呼吸困難、血痰
循環器科:胸口痛、心律不整、高血壓
整形外科:拗柴、骨折、關節痛、腰痛
泌尿器科:尿血、尿失禁、夜尿
眼 科:眼痛、眼充血
皮 膚 科:皮疹、毛髮異常 (如脫髮或毛髮增生)、指甲異常 (如卷甲)
中醫
中醫喺日本稱為「漢方医」,現時唔算主流,但近年都多咗唔少醫院設置漢方科,亦都多咗街外嘅中醫診所。可惜嘅係如果屬於保險範圍內嘅診治,醫生開嘅一般都係藥粉,如果想自己煲藥,選擇會少啲,而且幾乎都係保險範圍外,負擔會比較重。
中英文醫療機構及翻譯服務
日本大部分醫院同診所都係用日文,如果要搵外語嘅醫院同診所,可以用以下呢個網站:
日本政府観光局(JNTO)提供 病院の検索サイト
https://www.jnto.go.jp/emergency/chc/mi_guide.html
點選「醫療機構搜尋」,就可以搵到附近有無可以講英文或中文嘅醫院同診所,睇醫生嘅時候都唔使慌!
如果搵過自己附近冇可以對應外語嘅醫療機構,都唔使緊張,呢個時候你可以打電話使用「緊急時通訳サービス」。
「緊急時通訳サービス」係一條熱線電話,當你同醫療機構喺溝通上有困難,就可以打電話去請接線生幫你翻譯。
Tel: 03-5285-8185 (平日 5:00PM – 8:00PM、土日祝日 9:00AM – 8:00PM)
俗語都有話:「病向淺中醫」,如果有乜頭暈身㷫,就唔好忍,盡快睇醫生喇!