2026 年初，香港宏福苑一場大火，震驚整個社會。
新聞畫面入面，濃煙不斷湧出，消防員來回奔走，居民倉皇逃生。呢啲畫面，令身在日本嘅香港人都好不安。但更令人不安嘅，可能唔只呢個火災本身，仲有一個更貼身嘅問題：
如果喺日本身處火災現場嘅係我，我會點做？
對於身處日本嘅香港人嚟講，呢個問題更加值得認真思考。
因為，如果喺日本發生火警，我哋未必真係識應對。
我哋以為自己識，其實未必
當發現火警時，我哋大多都知道基本應對：
大聲呼叫「火事です！」通知其他人
↓
立即致電 119
↓
盡快撤離現場
逃生時亦有基本常識：
– 避免使用升降機
– 跟隨「非常口」指示離開
– 遇到濃煙，要壓低身體，用毛巾掩住口鼻
呢啲係最基本，但唔一定足夠。
當大門走唔到，你仲有冇第二條路？
火警最危險嘅一刻，往往唔係起火，而係你發現走廊已經被火或濃煙封住，無法由正門離開。
呢個時候，決定生死嘅，係你識唔識用「第二條路」。
而喺日本，好多建築其實已經幫你準備咗。
露台就係你嘅出口
試諗一個情景：你打開門，發現走廊已經充滿煙霧。
你退回屋內，心跳加速。呢個時候，你望向露台。
如果你住喺日本嘅マンション，行出露台，你腳下嗰塊金屬蓋，其實可能藏住一條逃生梯（避難はしご）。
呢個設置喺金屬蓋下方嘅逃生梯，係當發生火災、地震等緊急情況，而樓梯或電梯無法使用，甚至連走廊都被煙封住嘅時候，為你提供一條可以直接通往下一層嘅逃生通道。
點樣用
打開上蓋（掀開露台地面嘅金屬蓋）
↓
解除安全鎖（例如固定銷或兒童鎖）
↓
拉動拉桿
之後逃生梯就會向下展開，確認逃生梯完全展開後，就可以使用佢到達下一層。
好多時逃生梯都會以「千鳥式」設置，即係每一層嘅出口位置都係錯開嘅，唔係一條直線直上直落。換句話講，你落到下一層之後，出口會喺另一個位置，甚至可能去到另一個單位嘅露台。
所以你唔可以一次過直落到底，必須一層一層慢慢落，確認安全之後，再繼續去下一層，直到去到安全位置。
使用時要記住
– 一次只可以一個人落
– 雙手要握住踏板（唔係扶手）
– 每一步都要確認腳位
– 一層一層落，唔可以急
想更清楚了解實際操作，可以參考以下教學：
https://journal.anabuki-style.com/evacuation-ladder-of-the-apartment
隔離屋都係一條生路
除咗向下走，其實仲可以「向旁邊走」。
有啲單位本身露台未必設有逃生梯，因為按照大廈設計，逃生梯可能設置喺同層其他單位；而且由於「千鳥式」結構，你落到下一層之後，出口亦可能會喺另一個單位嘅露台。
換句話講，你未必可以只靠自己單位逃生。露台之間嗰塊薄板（隔て板），可能就係你通往下一條生路嘅關鍵。
點樣用
用腳踢／用硬物打破隔板
↓
進入隔離單位露台
↓
再搵其他逃生路線（樓梯／逃生梯）
有啲設施，你未必見過
除咗逃生梯同隔板，有啲建築仲會設有其他逃生設備，例如：
避難滑り台（逃生滑梯）
垂直式救助袋（避難袋）
呢啲設施可以幫助你由高處快速、安全撤離。
逃生滑梯
使用時只需要坐低喺入口位置，面向滑道，雙手抱住身體或輕貼兩側，順住滑道滑落到下一層，落地後立即離開出口位置。
垂直式救助袋
進入袋內後，身體會被包覆並慢慢向下滑落，下降速度會被控制，屬於較穩定嘅垂直逃生方式。
參考影片：https://www.youtube.com/watch?v=zJSipNmvCIU
最容易忽略嘅事
唔同建築會有唔同嘅逃生設備，你未必需要全部識，但一定要知道自己住嗰度有啲乜。
而且必需要做留意以下幾點：
– 入住時，請主動確認逃生設備位置同種類
– 保持露台暢通（特別係金屬蓋同隔板附近）
– 唔好堆放雜物阻礙逃生
另外好重要嘅一點，就係以上所講咗幾種逃生設備，可能大家一早都略知一二，但如果你未試過，你識唔會用，又會唔會敢用？
逃生設備存在，但如果唔識用或唔可以迅速地用，就會大大減低佢地嘅功用。
所以大家請喺有機會嘗試嘅情況下就試用吓，可以留意大廈防災演習，又或者去防災館親身試一次。
一齊準備，而唔係等發生
火災，冇人想遇到。
但準備，可以由今日開始。
日本香港人協會會定期舉辦防災館體驗活動，以廣東話講解，讓在日港人可以真正了解日本嘅火災﹑水災﹑地震等災害來臨時要使用嘅逃生程序同防災設施，並親身試用逃生設備。
如果你有興趣參與，歡迎留意我哋嘅最新消息，亦可以邀請身邊朋友一齊加入。
多一分了解，就多一分生存機會。
喺異地生活，我哋更加需要為自己，亦為身邊嘅人做好準備。