日本睇醫生須知第2彈！日本每年12月至 3月係流感高峰期，緊接住2月至4月又係花粉症重災區，醫院診所門口隨時大排長龍。如果你啱啱搬嚟日本，或者之前未試過喺日本睇醫生，可能會覺得想睇醫生但唔知點好？
今次我哋會簡單介紹點搵醫院同介紹咩係仿製藥，等你喺需要時可以順利就醫！
之前我哋都有介紹過睇醫生嘅基本流程同所需文件，大家可以睇呢到重溫。
1. 日本醫院類型與選擇方式
日本醫療機構主要分為 「診所（クリニック）」 同 「大醫院（総合病院）」。
可能大家會諗去 大醫院睇病會比較好，但其實日本政府為咗避免小病患者直接湧入大醫院，影響重病患者資源，規定病床超過200張以上嘅大醫院，對「無介紹信」嘅初診病人收取額外費用！
所以建議大家如果身體唔舒服，可以先去屋企或公司附近嘅內科診所（クリニック）。
如果有需要，醫生會開「介紹信（紹介状）」轉介去專科/大醫院。
| 醫院類型 | 特點 | 費用 | 睇病流程 |
| 診所（クリニック） | 街坊醫生、細規模診所 | 約 2,000～3,000日圓 | 基本直接去就得*發燒患者要事先確認 |
| 大醫院（総合病院） | 設備齊全，專科醫生多 | 5,000日圓以上 | 無介紹信要加收「選定療養費*」 |
*選定療養費
每間醫院收費唔同，但政府有規定最低金額：
① 200-499張床（初診：5,000～7,000日圓/ 覆診：2,000～3,000日圓）
② 500張床以上（初診：7,000～11,000日圓/ 覆診：2,500～5,000日圓）
2. 點樣搵醫院？
相信好多港人居住喺日本時都會 諗應該點揀醫院，大家可以先問吓公司同事/學校老師有冇介紹，又或者透過網上醫院搜尋網站睇吓評價。
大家搵診所記住留意休診日同診療時間，會唔會只接受有預約嘅患者。如果不幸有發燒，就最好先打電話問一問，因為唔係所有診所都會接受發燒患者，以免去到撲空。
下面為大家介紹幾個醫院搜尋網站：
- 東京版救急受診ガイド
https://www.tfd.metro.tokyo.lg.jp/hp-kyuuimuka/en_guide/main/index.html
呢個網站有日文版同英文版。網站內會問你大約五條問題，包括你嘅年齡同症狀，之後佢就會判斷出你應該喺幾多小時之內去睇邊一科嘅醫生，相當有用！
- 病院なび
按病徵搜尋醫院，可揀「英語対応（提供英文對應）」，方便唔熟日文嘅人。
- EPARK クリニック・病院
同病院なび一樣可以根據地區同按症狀搵醫院，如果有發燒都可以揀肯接收發燒患者既診所。部分診所可網上預約。
- JNTO（日本政府觀光局）
https://www.jnto.go.jp/emergency/chc/mi_guide.html
提供日英中韓語醫院名單
3. 先發藥VS仿製藥？
當你睇完醫生嗰陣，醫生或者問診表上可能會問你 「想唔想用仿製藥（ジェネリック藥）」， 但你又知唔知仿製藥係咩嚟？
簡單嚟講，仿製藥係專利期過後，由其他藥廠生產嘅仿製藥，成分同藥效幾乎同原廠藥一樣，但價格通常較原廠平，而且選擇較多。
睇醫生或者攞藥時，如果想要仿製藥可以問「ジェネリックにできますか？」。
專利藥（先発薬）vs. 仿製藥（ジェネリック藥）
| 藥品類型 | 專利藥（先発薬） | 仿製藥（ジェネリック藥） |
| 定義 | 藥廠原創開發、擁有專利的藥物 | 專利期過後，其他公司仿製的藥物 |
| 效果 | 經長時間臨床試驗驗證，確保安全性 | 成分一樣，效果基本相同 |
| 價格 | 較貴（保險適用後仍較高） | 約 30%～50% 更便宜 |
| 生產公司 | 由原研藥廠獨家生產 | 多間藥廠生產，選擇更多 |
| 可否替換？ | 醫生處方決定 | 病人可以要求藥局替換 |
一般情況下，醫生都會開可以轉仿製藥嘅處方，但大家可以睇吓藥單（処方箋）上面有冇特殊記號。如果冇就代表可以自由選擇仿製藥，如果有剔號、交叉或「変更不可（不可更換）」標示，則唔可以轉藥。如果唔想因為藥品短缺而白行幾間藥局，建議去診所附近嘅藥局拎藥，通常會較齊所需藥物！另外，藥單嘅有效期係發出後 4 日（包括假日），過期就要再去醫院補發，記得唔好拖太耐！
最後溫馨提示大家，由2024年12月起，日本政府已停止發行新嘅保險證，現有健康保險證只可用到 2025 年 12 月，之後必須轉用「個人編號卡（マイナンバーカード）」，如果未有個人編號卡就記得要申請返喇。
當然，最理想係大家都健健康康，唔使睇醫生！不過保險費都交咗，唔用又好浪費，例如定期洗牙、做身體檢查，都係保險可以Cover嘅服務！