講起去新潟縣旅行,大家都應該知道新潟嘅稻米同酒好出名,同埋日本人好鍾意去嘅滑雪勝地。除此之外,新潟縣同四國瀨戶內一樣有舉辦藝術祭。「越後妻有大地の芸術祭」(Echigo Tsumari Art Triennale)自2000年起每3年舉辦一次,係全球規模最大嘅國際戶外藝術祭。受到疫情影響而延期一年舉行,今年已經係第8屆!4月29號至11月13號開展(逢星期二及星期三休息),展期為145 日,係歷屆展期最長嘅一屆,橫跨春、夏、秋三季。
藝術祭嘅由來
位於日本新潟縣南部嘅十日町市、津南町一帶,稱為越後妻有地區,面積約760平方公里,比東京23區仲要大!當地以農業為主,同各地嘅鄉村一樣,隨著人口急速外流,越後妻有地區開始面臨人口老化、房屋冇人住、好多廢校出現、耕地荒廢等問題。為咗振興經濟,由國際知名策展大師北川富朗嘅專業團隊策劃下,期望借助藝術嘅力量、透過居民同支援團體共同合作,令當地重現生氣。
以農田作為舞台、藝術作為橋樑,以「人類就喺自然之中」作為主題,透過藝術探討人與自然嘅關喺,傳達出人同大自然密切相連嘅概念。藝術品分散喺6個地區十日町、川西、津南、中里、松代、松之山,約 200 個地點。喺越後妻有地區隨處可以見到各種風格迥異嘅藝術作品。部分作品置於市區,部分喺廢棄嘅房屋、舊校舍。當中有黎自香港藝術家又一山人(黃炳培)嘅作品―「香港部屋」,開展以《自然。共話。》為題互動創作,藉藝術推動兩地文化交流。
常設展品、農村體驗
即使錯過咗藝術祭展期嘅遊客,仲有全年開放嘅常設展作品可以參觀,包括「越後妻有里山現代美術館KINARE」同係松代車站隔離嘅「農舞台」、森林學校「Kyororo」等主要設施同戶外展品。此外,每年亦會定期舉行四季微展活動,加入新作品同公開展品。
參觀藝術品同時,可以飽覽梯田、清津峽等自然美景外,感受鄉村純樸同僻靜嘅一面,仲可以體驗各類活動、參加手工教室等。
展品同藝術家詳情請參考以下官方網址:https://www.echigo-tsumari.jp/art/
主辦單位也有提供中、英同韓文嘅影像導覽,外國遊客可以直接用智能手機觀賞介紹影片。
行到攰肚餓推薦大家去位於農舞台嘅「越後松代里山食堂」食飯,可以品嚐當地農家種嘅蔬果,一嚐地道風味!
如果想觀賞藝術祭嘅代表作,由於展期係有限定,推薦利用由「JR越後湯澤」站開車嘅事前預約制周遊巴士。除咗有主辦單位舉辦嘅導賞團外,亦可配合想睇嘅作品、停留日數、參加人數,安排自家製行程。官方團參加費用包含巴士、午餐、保險、行程導覽費用(※注意:藝術祭鑑賞通票需要另外購買)。預約請參照各行程詳細內容:https://www.echigo-tsumari.jp/visit/v_category/model_course/
門票價錢
根據美術展覽同作品,會出售個別門票。如果想欣賞所有藝術作品,建議購買作品鑑賞通票。成人票售4,500日圓。詳情請參考官方網站。
住宿體驗
如果唔想即日來回咁攰,想深度遊慢慢欣賞哂各藝術作品,不妨體驗住當地農家民宿。官方網站上面介紹咗當地不同民宿:廢校改建嘅溫泉旅館、古民家、藝術作品等等。
交通方式
可以搭新幹線、自己揸車或去到當地租車前往。
- 「東京」站搭JR上越新幹線前往 「JR 越後湯澤」站→再轉搭北越急行北北線→喺「十日町」站或「松代」站落車。
- 由東京出發自行揸車,可行關越高速公路,喺六日町交流道下高速公路,再轉行駛 253 號公路。
- 喺越後妻有地區亦可租車,詳細請參考官方交通指南「レンタカー」部分。