「瀨戶內國際藝術祭」(Setouchi International Art Festival)自2010年成立,每逢3年舉辦一次。喺結合現代美術、當地傳統文化、歷史、自然嘅大型藝術展覽,展覽範圍橫跨香川縣直島、岡山縣犬島、瀨戶內海上嘅大小島嶼,展示黎自世界各地33個國家同地區共184組藝術家及藝術團體嘅作品。過去2年多,因為疫情影響好多祭典、大型活動都被迫取消停辦!而瀨戶內國際藝術節喺2022年4月14日如期開幕,今年已經踏入第5屆,以 「海洋復興」為主題,透過藝術家與島民嘅合作,令人口不斷減少嘅瀨戶內海群島重現生氣,期待瀨戶內海成為 「希望之海」。
同以往一樣,分為春、夏、秋3個展期,春季展期喺4月14號~5月18號,夏季展期為8月5號~9月4號,秋季展期則為9月29號~11月6號。除咗可以欣賞草間彌生、安藤忠雄、妹島和世、藤本壯介、內藤禮、橫尾忠則等過百組當代藝術家嘅作品,藝術節真正魅力所在,喺可以感受小島上自然同歷史,品嘗鄉土美食,同當地人交流!沿途仲可以飽覽瀨戶內海嘅群島風光。
瀨戶內國際藝術節 2022 展期如下:
展期 | 期間 | 會場 |
春季 | 2022年4月14號(四)~5月18號(三) 「已完結」 | 直島、豐島、女木島、男木島、小豆島、大島、犬島、高松港周邊、宇野港周邊、※沙彌島(春天限定) |
夏季 | 2022年8月5號(五)~9月4號(日) | 直島、豐島、女木島、男木島、小豆島、大島、犬島、高松港周邊、宇野港周邊 |
秋季 | 2022年9月29號(四)~11月6號(日) | 直島、豐島、女木島、男木島、小豆島、大島、犬島 、高松港周邊、宇野港周邊、※本島、高見島、粟島、伊吹島(秋天限定) |
交通方式
由於藝術品分布喺瀨戶內海上唔同嘅小島,大致可分為「東邊」同「西邊」。
東邊包含直島、小豆島、豐島、男木島、女木島、大島、犬島,而西邊就有本島、沙彌島、高見島、粟島、伊吹島。
如果要去哂所有地方需要花唔少時間同體力,建議大家先去官網了解下作品嘅位置再計劃行程!
官網:https://setouchi-artfest.jp/tw/artworks-artists/artworks/
去東邊嘅話可以由香川縣「高松港」或岡山縣「宇野港」出發;而去西邊可以由香川県西部嘅各港口、岡山縣兒島観光港出發,
推薦大家以香川縣嘅JR「高松站」為起點,搭JR到達會比較方便。
同埋如果拎住個大喼移動嘅話,喺非常之麻煩。可以將部份行李放喺酒店、或者寄存喺Coin Locker。
如果時間充裕,可以唔需要跳島直接住埋喺小島上,體驗一下島上嘅民宿或酒店。
來往小島之間嘅交通主要依賴渡輪。除咗每次搭船前要買船票之外,如果計劃到訪多個小島,推薦大家買3日渡輪券「共通乗船券」(2,600日圓連稅)。
可以3日內無限次乘搭渡輪嘅船飛,由高松前往各小島嘅話,單程需要花費500~700日圓。
3日之內環遊2個以上小島嘅話,買3日券就比較抵!https://setouchi-artfest.jp/visit/ferry-pass.html
港口 | 各小島 |
高松港 | 直島、豐島、小豆島、女木島、男木島、大島 |
宇野港 | 直島、豐島 |
丸龜港(丸龜市) | 本島 |
寶傳港(岡山市) | 犬島 |
須田港(三豐市) | 粟島 |
多度津港(多度津町) | 高見島 |
觀音寺港(觀音寺市) | 伊吹島 |
門票價錢
瀨戶內國際藝術節嘅作品數量眾多,部分藝術裝置設置喺戶外,唔需要門票都可以欣賞,亦有好多室內作品會提供現場賣飛服務。推薦大家買鑑賞PASSPORT,喺3個會期全部有效嘅通行證只需要5000日圓(連稅)。想即日來回嘅朋友,亦都可以買「一日券」(1,800日圓連稅)。詳情請參考:https://setouchi-artfest.jp/tw/visit/passport/
瀨戶內國際藝術節官方APP
比起上屆,今次仲推出咗電子作品鑑賞PASSPORT嘅官方 APP( Setouchi Digital Passport),可以買到春、夏、秋個別會期有效嘅「鑑賞PASSPORT」同全會期有效嘅「 3 會期通用鑑賞PASSPORT」,對應日、英文、繁體、簡體、韓文等5種語言,仲有優惠券可以使用。詳情請參考:https://setouchi-artfest-passport.eplus.jp/tw
而且有一部分之前嘅藝術節作品更會以常設展出,非藝術節期間都會開放,建議大家可以到官方網站睇睇。
同埋想參觀各小島美術館等設施,記得事先查詢需唔需要預約同預購門票時間。如果唔知道點樣安排行程,亦可以參考官方導覽指南手冊同官方APP公佈嘅推介路線。距離各小島最近嘅車站亦都可以到官網查詢,車站同港口之間嘅路線巴士等詳細資訊等都可以用官方APP查詢。